मोरङका सीडीओ सटरमा, दाताको सहयोगमा बन्दैछ कार्यालय

कार्यालय सञ्चालनका लागि विभिन्न संघसंस्थाले कम्युटर, प्रिन्टर, टेबल, कुर्सीलगायत संरचना जुटाइदिएका छन् । बिहीबार जीवन विकास लघुवित्त वित्तीय संस्थाले तीन वटा कलर प्रिन्टर सहयोग गरेको छ । जीवन विकासका नायव प्रमुख कार्यकारी अधिकृत दामोदर रेग्मीले प्रमुख जिल्ला अधिकारी यादवलाई प्रिन्टर हस्तान्तरण गरे । यसअघि नेपाल उद्योग वाणिज्य संघ कोशी प्रदेशले १० वटा कम्युटर सहयोग गरेको थियो । निर्माण व्यावसायी संघले कार्यालय मर्मत गर्दैछ । राष्ट्रिय परिचयपत्र वितरणका लागि छुट्टै टहरा पनि संघले निर्माण गर्दैछ । इँटा व्यावसायी संघले २१ वटा टेबुल-कुर्सी सहयोग गरेको छ । यसैगरी सुनौलो पूर्व नेपाल यातायात व्यावसायी संघले पंखा, मदिरा व्यावसायी संघले कुर्सी सहयोग गरेको छ । रङरोगनका लागि एसियन पेन्टसले रङ दिएको छ । रङरोगनको लागत उद्योग वाणिज्य महासंघले ब्यहोर्ने बताएको छ । कार्यालयको नेटवर्किङ कम्युटर एसोसिएसनले गर्दैछ । अन्य संघसंस्थाले पनि सहयोग गरेका छन् । थप सहयोगको आश्वासन पनि आएको छ । कार्यालयका लागि आवश्यक सामग्री संघसंस्थाको जुटाउने काम भइरहको यादवले बताए । तत्काल सेवा प्रवाहका लागि १२ थान कम्युटर, ५ थान प्रिन्टर र टेबल-कुर्सी सहयोग आएको उनले बताए ।

२०४८ सालदेखिको अभिलेख नष्ट

आगजनी र लुटपाटबाट जिल्ला प्रशासन कार्यालयको संरचनामा मात्रै ४ करोड बराबरको क्षति भएको अनुमान छ । अफिस सामग्रीमा भएको क्षतिको विवरण संकलन भइरहेको छ । प्रमुख जिल्ला अधिकारी यादवका अनुसार २०४८ सालयताको नागरिकताको अभिलेख नष्ट भएको छ । यो अवधिमध्ये २०७२ सालदेखिको अभिलेख भने अनलाइन थियो । २०४८ सालदेखि २०७२ सालसम्मको लिखित अभिलेख नष्ट भएको छ । २०४८ सालअघिको अभिलेख भने छुट्टै कोठामा थियो । आगलागीबाट सो अभिलेख भएको कोठा जोगिएको उनले बताए । नागरिकता अभिलेख नष्ट भएका कारण नागरिकता वितरणमा कठिनाइ हुने उनले बताए । प्रमुख जिल्ला अधिकारी यादवका अनुसार कार्यालयमा वितरणका लागि राखिएका करिब डेढ लाख राष्ट्रिय परिचयपत्र जलेर नष्ट भएको छ । करिब ३० हजार राष्ट्रिय परिचयत्र पत्र जोगिएको छ । राष्ट्रिय परिचयपत्र बनाउँदा पेस भएका कागजात सबै जलेर नष्ट भएको छ । करिब ४०० राहदानी जलेको छ । जिल्ला प्रशासन कार्यालयमा विचाराधीन रहेका ४०० मुद्दाको मिसिल पनि ध्वस्त भएको छ । जिल्ला प्रशासन कार्यालयमा नागरिकता वितरण, राष्ट्रिय परिचयत्रपत्र र राहदानीको काम रोकिएको छ ।  कार्यालय मर्मतपछि यी सेवा दशैंपछि सुरु गर्ने तयारी छ । अहिले अत्यावश्यक काम सञ्चालन भइरहेको छ ।