प्रशासन मन्त्री राजकुमार गुप्ताले दिए राजीनामा

काठमाडौँ । घुस लिएको आरोपमा मुछिएका संघीय मामिला तथा सामान्य प्रशासनमन्त्री राजकुमार गुप्ताले पदबाट राजीनामा दिएका छन्। उनले आज प्रधानमन्त्री केपी शर्मा ओलीसमक्ष राजीनामा दिएका हुन् ।

मन्त्री गुप्ताले आफूमाथि लागेको आरोपको अनुसन्धान गरी सत्य तथ्य बाहिर ल्याउन सहयोग पुगोस् भनेर राजीनामा दिएको बताए । उनले आजसम्म आफूलाई सहयोग गरेका सबैप्रति धन्यवाद व्यक्त गर्दै आगामी दिनमा पार्टीले दिएको जिम्मेवारी निष्ठापूर्वक पूरा गर्ने प्रतिबद्धता व्यक्त गरे ।

केही दिनअघि गुप्ताको घुस लिँदै गरेको भनिएको अडियो सार्वजनिक भएपछि उनी चौतर्फी आलोचना र दबाबमा परेका थिए। विपक्षी दलहरूले राजीनामासहित कानुनी कारबाहीको माग गर्दै आएका थिए।

सार्वजनिक भएको अडियो रेकर्डिङअनुसार, गत पुस-माघतिर उनले कास्कीको भूमि आयोगको अध्यक्ष नियुक्तिको विषयमा काम गरिदिने भन्दै रकम लिएका थिए। अडियोमा पोखराको जग्गासम्बन्धी कुराकानीसमेत समेटिएको छ।

गुप्तामाथि विभिन्न मालपोत कार्यालयका कर्मचारीसँग फोनमार्फत ‘सहयोग’ माग्ने र मागअनुसार नमान्दा अन्तर मन्त्रालय सरुवा गरिदिने धम्की दिने गरेको आरोप पनि छ।