पूर्वाधार कार्यालयमा पत्रकार साहमाथि हातपात, प्रेस स्वतन्त्रतामाथि आक्रमण

२५ असार, महोत्तरी ।

महोत्तरीको जलेश्वरस्थित पूर्वाधार विकास कार्यालय परिसरमा एचटिपी खबरका संचालक एवं पत्रकार दिवाकर साहमाथि भएको आक्रमण र दुर्व्यवहारप्रति मधेश प्रदेश मिडिया काउन्सिल र नेपाल पत्रकार महासंघ मधेश प्रदेश समितिले गम्भीर ध्यानाकर्षण जनाएको छ। असार २३ गते राति करिब १ बजेको समयमा सरकारी कार्यालयमा असार मसान्तको अवसर पारेर अनैतिक लेनदेन र सार्वजनिक कोष दुरुपयोग भइरहेको भन्ने सूचनाका आधारमा समाचार संकलन गर्न पुगेका पत्रकार साहमाथि कार्यालय परिसरमै उपस्थित केही व्यक्तिहरूले दुर्व्यवहार र हातपात गरेका थिए।

पत्रकार साहले प्रयोग गर्दै आएका समाचार संकलन उपकरण खोसिएको र सहयोगीमाथि समेत हातपात भएको बताइएको छ। मधेश प्रदेश मिडिया काउन्सिलले पत्रकारमाथिको आक्रमणलाई प्रेस स्वतन्त्रता, अभिव्यक्ति स्वतन्त्रता र संवैधानिक अधिकारमाथिको गम्भीर आघातको रूपमा लिँदै दोषीमाथि तत्काल कानुनी कारबाही गर्न माग गरेको छ।

काउन्सिलको भनाइमा, पत्रकारले गल्ती गरे कानुनी प्रक्रिया अवलम्बन गर्ने वैधानिक बाटो खुला छ, तर शारीरिक दुर्व्यवहार र समाचार संकलनमा अवरोध गर्नु निन्दनीय छ। यस्तै, नेपाल पत्रकार महासंघ मधेश प्रदेश समितिले पनि घटनालाई प्रेस स्वतन्त्रतामाथिको खुला हस्तक्षेप भन्दै कडा शब्दमा भर्त्सना गरेको छ। महासंघले पत्रकार साहमाथि दुर्व्यवहार गर्ने व्यक्तिहरूलाई छिटोभन्दा छिटो कानुनी दायरामा ल्याउन सम्बन्धित निकायसँग जोडदार माग राखेको छ।