कसैसँग दम भए मैले भ्रष्टाचार गरेको कुरा ल्याओस् : प्रधानमन्त्री ओली

काठमाडौं। प्रधानमन्त्री केपी शर्मा ओलीले कसैसँग दम भए आफूले भ्रष्टाचार गरेको एउटा कुरा ल्याउन चुनौती दिएका छन्। शुक्रबार प्रतिनिधिसभाको अधिवेशनलाई सम्बोधन गर्दै ओलीले यस्तो बताएका हुन्। उनले भने, ‘म दावासाथ भन्छु, दुनियाँको अगाडि उभिएर भन्छु, भ्रष्टाचार गर्दिनँ, कसैसँग दम छ भने भ्रष्टाचार गरेको एउटा कुरा ल्याओस्।’

ओलीले संसदको पाँचौं अधिवेशन वजनदार होस् भन्ने सरकारको अपेक्षा रहेको बताए। ‘झुटा आरोप र लान्छनामा संसद केन्द्रित नहोस्, देशको विकास र सुशासनको पक्षमा सरकारलाई गम्भीर सुझाव दिनुहोस्,’ उनले भने। उनले संसद सबैको विचार व्यक्त गर्ने ठाउँ रहेको भन्दै यहाँ सबैले थिति, विधि र नियमअनुसार अभिव्यक्ति राख्नुपर्ने बताए। उनले सरकारले कहीँ आलोचनायोग्य काम गरेको नपाएको बताए। कसैले पनि सन्तोषजनक काम गरेको भनेर कसैले नभनेको बरू हावादारी कुरा गरिरहेको बताए।

‘कसैले स्वीस बैंकमा यति अर्ब राखेको छ, टेलिकममा यति अर्ब राखेको, यसमा यति अर्ब राखेको छ भन्दै हिँडे, पहिले पशुपतिमा सुन भनेर पित्तल राख्यो भनेर कराउनेहरू पनि यतैतिर लागिपरेका छन्,’ उनले भने। सरकारको आलोचना गर्ने काम कसैले नै नगरेको भन्दै उनले सरकारका काम कारबाहीको रचनात्मक आलोचना हुन जरुरी रहेको बताए। ‘गलत कामबाट रोक्न टिप्पणी आलोचना गर्नुहोस्, चरित्रहत्या गर्नेगरी कपोलकल्पिच, निराधार हल्ला गर्नु र तिनको पछाडि लाग्नु गलछ छ,’ उनले भने।