‘सुरक्षित पानी पिउने’ योजना निर्माण सम्बन्धी दुई दिने तालिम सम्पन्न

सर्लाही, ९ भदौ । ‘सुरक्षित पानी पिउने’ पूर्व योजना निर्माण सम्बन्धी दुई दिने तालिम सर्लाहीको पर्सा गाउँपालिकामा सम्पन्न भएको छ ।पर्सा गाउँपालिका र एसएनभी नेपालको संयुक्त साझेदारीमा ‘ग्रामिण जलवायु उत्थानशिल सेवा’ परियोजना पर्सा गाउँपालिकामा संचालित रहेको छ । जसअन्तर्गत पर्सा गाउँपालिका–६ का श्रीराम जलवायु उत्थानशिल खानेपानी आयोजनाका उपभोक्ता समिति तथा गाउँपालिकाका प्रतिनिधिहरुलाई दुई दिने आयोजना निर्माण पूर्व तालिम दिईएको एसएनभी नेपालका सर्लाही संयोजक अम्बिका यादवले जानकारी दिनुभयो । तालिमको प्राविधिक सहजिकरण एसएनभी नेपालका आरडब्लूएसएस एडभाईजर मदन बहादुर भण्डारीले गर्नुभएको थियो।एसएनभी नेपालको सहयोगमा पर्सा गाउँपालिकामा सुरक्षित पानी पिउने अभियान संचालन भएपछि कैण्डल फिल्टरको प्रयोग बढेका छन् । सुरक्षित पानी पिउने सम्बन्धमा एसएनभी नेपालले पर्सा गाउँपालिकाका स्थानियहरुलाई प्राविधिक सहजिकरण गरेपछि स्थानियहरुले कैण्डल फिल्टरको प्रयोग गर्नेक्रम बढ्दो अवस्थामा रहेको संयोजक यादवले बताउनुभयो ।पर्सा गाउँपालिकामा अधिकांश खानेपानीको चपाकल सुकेका छन् । पर्सा गाउँपालिकामा एसएनभी नेपालको सहयोगमा शुद्ध खानेपानीको लागि पाँच ठाउँमा पानी ट्यांकीसमेत जडान गरिएको छ । त्यस्तै ६३ घरधुरीलाई लक्षित गरी पर्सा–६ मा श्रीराम खानेपानी योजनाको स्थापना समेत गरिएको छ । त्यस्तै पर्सा गाउँपालिकामा एसएनभी नेपालले ५० जना स्वयंम सेविकाहरुलाई परिचालन गरेको छ । स्वयंम सेविकाहरुले स्थानियहरुलाई सुरक्षित पानी पिउनेको बारेमा जनचेतना जगाउने लगायतको काम गर्दै आएका छन् ।