राजसंस्था पुनर्स्थापना संयुक्त जनआन्दोलन समितिका जनकमान्डर दुर्गा प्रसाईंले आफूलाई जनरबन्दमा राख्नेसम्मको योजना बनिरहेको दाबी गरेका छन्। ‘सरकार अत्तालिएको छ, मलाई नजरबन्द गर्नेसम्मको योजना बुन्दैछ। तर, म डराउँदिनँ, भाग्ने छैन,’ उनले भनेका छन्।उनले चैत १५ अर्थात् भोलि नेपालीहरूको मुक्तिको लागि होमिने दिन भएको पनि बताएका छन्।

‘नेपाल आज इतिहासकै सबैभन्दा कठिन अवस्थामा आइपुगेको छ। नेपालभित्र नेपाली छैनन्, व्यापार छैन, रोजगारी छैन, मुट्ठीभर मारवाडीको हातमा राज्यको सारा सम्पत्ति छ। बैंक, सहकारी लघुवित्त पीडितको रुवाबासी छ। हामी नेपाली अभिभावक बिहिन छौँ। अब हामी चुप लागेर बस्ने दिन छैनौँ,’ उनले सामाजिक सञ्जाल फेसबूकमा लेखेका छन्। अब दल, संस्था वा विचार भनेर मात्रै देशको रक्षा नहुने उनले बताएका छन्।