मर्मत सम्भार गर्न त्रिपालले छोपियो सिंहदरबार

८ असोज, काठमाडौँ ।

ऐतिहासिक सरकारी भवन सिंहदरबार त्रिपालले ढाकिएको छ। गत भदाै २३ र २४ गते जेनजी आन्दोलनको क्रममा लागेको आगलागीले क्षति पुर्‍याएको कारण मर्मत सम्भारको काम सुरु भएपछि भवनलाई अस्थायी रूपमा त्रिपालले छोपिएको हो। सिंहदरबारलाई सुरक्षित राख्दै संरचनागत क्षति न्यूनीकरण गर्न प्राविधिक टोलीले अस्थायी आवरण निर्माण गरी भित्रि भागमा मर्मत कार्य अगाडि बढाइरहेको छ। भवनको छत, झ्यालढोका, भित्तो र आन्तरिक सजावटसमेतलाई मर्मत गर्ने तयारी भइरहेको छ।

संस्कृति, पर्यटन तथा नागरिक उड्डयन मन्त्रालयका अधिकारीका अनुसार सिंहदरबारलाई ऐतिहासिक वास्तुकलाको मौलिकता नबिगारी पुनःस्थापना गर्ने गरी काम गरिनेछ। ‘भवनलाई बाहिरी वातावरण र वर्षात्‌को असरबाट जोगाउन त्रिपाल प्रयोग गरिएको हो, यो अस्थायी व्यवस्था मात्रै हो,’ एक प्राविधिकले भने। नेपालको प्रशासनिक केन्द्रका रूपमा रहँदै आएको सिंहदरबारको ऐतिहासिक महत्वलाई मध्यनजर गर्दै यसको दीर्घकालीन संरक्षणका लागि विशेष योजना बनाउने तयारी समेत भइरहेको मन्त्रालयले जनाएको छ।