नागरिक एपमार्फत राहदानी आवेदन दिन मिल्ने सुविधा ल्याउँदै सरकार

२ वैशाख, काठमाडौँ ।

सरकारले अघि सारेको १०० बुँदे शासकीय सुधार कार्यसूचीको बुँदा नम्बर ३१ कार्यान्वयनका लागि राहदानी विभागले प्राविधिक तयारी सुरु गरेको छ । नागरिक एपमार्फत राहदानी आवेदनलाई सहज बनाउने र सेवाग्राहीले आफ्नै मोबाइलमा रहेको डेटा प्रयोग गरी ‘अटो फिल’ मार्फत फाराम भर्न सक्ने व्यवस्था मिलाउन विभागले सूचना प्रविधि विभागसँग समन्वय अगाडि बढाएको हो । राहदानी विभागका सूचना प्रविधि निर्देशक सुनिल कुमार केसीका अनुसार यस योजनालाई कार्यान्वयनमा लैजान गत २० चैतमा सूचना प्रविधि विभागसँग विस्तृत छलफल गरिएको थियो ।

सोही छलफलका आधारमा २२ चैतमा विभागले क्यूआर कोड जेनेरेट गर्ने र त्यसपछिका प्रक्रियाका लागि आवश्यक पर्ने एपीआई कलेक्सन उपलब्ध गराइसकेको छ । हाललाई नागरिक एपमा रहेको क्यूआर स्क्यानिङमार्फत सेवाग्राहीले आफ्नो विवरण फाराममा भर्न सक्ने गरी पूर्वाधार तयार पारिएको विभागले जनाएको छ । यद्यपि, हाल सञ्चालनमा रहेको राहदानी प्रणालीको सम्झौता सन् २०२६ जुलाईसम्म मात्र रहेकाले तत्कालै प्रणालीमा ठुलो हेरफेर गर्न प्राविधिक चुनौती रहेको निर्देशक केसीले बताए । उनका अनुसार पुरानो प्रणालीमा कुनै पनि फिचर थपघट गर्न ‘चेन्ज रिक्वेस्ट’ (Change Request) प्रक्रियामार्फत जानुपर्ने हुन्छ, जसमा करिब दुईदेखि तीन महिना समय लाग्न सक्छ ।

यसैलाई मध्यनजर गर्दै विभागले नयाँ राहदानी प्रणाली विकास गरिरहेको र नयाँ आवेदन प्रणाली सुरु भएसँगै नागरिक एपबाटै पूर्ण रूपमा आवेदन दिन सकिने गरी आवश्यक एपीआईहरू विकास गरिरहेको उनले जानकारी दिए । हाल नागरिक एपमा राहदानी लिंक गरी विवरण हेर्न सकिने व्यवस्था छ । सरकारले १४ चैतमा सार्वजनिक गरेको १०० बुँदे कार्यसूचीमा ४५ दिनभित्र राहदानी, सवारीचालक अनुमति पत्र र प्रहरी प्रतिवेदनका लागि नागरिक एपमार्फत आवेदन दिन सकिने व्यवस्था मिलाउने लक्ष्य राखेको छ ।