माघ २८, सर्लाही।

हरिपुर नगरपालिका–२ स्थित प्राथमिक स्वास्थ्य केन्द्रमा डिजिटल एक्स–रे सेवा औपचारिक रूपमा सञ्चालनमा आएको छ। गत सोमबार एक कार्यक्रमका बीच उक्त सेवाको समुद्घाटन गरिएको हो।

कार्यक्रममा हरिपुर नगरपालिकाका प्रमुख गोपाल परियारले डिजिटल एक्स–रे सेवा सुरु भएसँगै स्थानीय नागरिकले अब सामान्य जाँचका लागि जिल्ला सदरमुकाम वा बाहिर धाउनुपर्ने बाध्यता अन्त्य हुने बताए। उनले स्वास्थ्य सेवा विस्तार र गुणस्तर सुधार नगरपालिकाको प्राथमिकतामा रहेको उल्लेख गरे।

उपप्रमुख निलमदेवी राय यादवले ग्रामीण भेगका बिरामीलाई सहज, छिटो र सुलभ स्वास्थ्य सेवा उपलब्ध गराउने उद्देश्यले डिजिटल प्रविधि जडान गरिएको बताइन्। उनले स्वास्थ्य केन्द्रलाई क्रमशः थप उपकरण र जनशक्तिबाट सुदृढ बनाइने जानकारी दिइन्।

प्रमुख प्रशासकीय अधिकृत विनय पौडेलले आधुनिक प्रविधिको प्रयोगले सेवा प्रवाह छिटो र प्रभावकारी हुने विश्वास व्यक्त गरे। डिजिटल एक्स–रे प्रणालीले कम समयमा स्पष्ट रिपोर्ट उपलब्ध गराउने र उपचार प्रक्रियालाई सहज बनाउने उनको भनाइ थियो।

उक्त कार्यक्रममा जनस्वास्थ्य निरीक्षक नवल किशोर रायले डिजिटल एक्स–रे सेवा सञ्चालनमा आएको जानकारी दिँदै यसले विशेषगरी दुर्घटना तथा हड्डीसम्बन्धी समस्याका बिरामीलाई ठूलो राहत मिल्ने बताए।

स्थानीय बासिन्दाले स्वास्थ्य केन्द्रमै आधुनिक सेवा सुरु भएकोमा खुशी व्यक्त गरेका छन्। अब सामान्य एक्स–रे जाँचका लागि बाहिर जानुपर्ने बाध्यता हट्ने अपेक्षा गरिएको छ।