रुखबाट लडेर घाइते भएका वृद्धको मृत्यु

२४ चैत,  हेटौंडा —

हेटौंडामा दुई दिनअघि रुखबाट लडेर घाइते भएका एक वृद्धको आइतबार मृत्यु भएको छ । हेटौंडा उपमहानगरपालिका—१ चौकीटोलका ६२ वर्षीय भरतबहादुर आलेमगर शुक्रबार रुखबाट लडेर घाइते भएका थिए । उपचारका निम्ति चितवन मेडिकल भरतपुरमा लगिएको थियो । अस्पतालका चिकित्सकहरुले उपचार सम्भव नहुने भनेर आइतबार घर फकाइदिएका थिए ।

घरतर्फ ल्याउने क्रममा उनको बाटोमै मृत्यु भएको जिल्ला प्रहरी कार्यालय मकवानपुरका प्रहरी नायब उपरीक्षक एवं प्रवक्ता श्यामु अर्यालले बताए । हेटौंडा अस्पतालमा उपचार सम्भव नभएपछि चितवन मेडिकल कलेज लगिएको थियो । आफ्नै घर अगाडिको सरिफाको रुखमा चढेर सरिफा टिप्न खोज्दा आले मगर लडेर घाइते भएका थिए । जिल्ला प्रहरी कार्यालय मकवानपुरका अनुसार चालु आवको ९ मकवानपुर रुख र भीरबाट लडेर ३ जना महिलासहित १२ जनाको मृत्यु भइसकेको छ । यस अवधिमा १३ जना घाइते भएका छन् ।