सर्लाहीको ऐतिहासिक नाढीमन तालमा डुङ्गा संचालन पुनः सुचारु

२० माघ,  सर्लाही जिल्लाको चन्द्रनगर गाउँपालिकामा रहेको नाढीमन तालमा पुनः डुङ्गा सञ्चालन सुरु गरिएको छ। गाउँपालिकाले दुई वटा विद्युतीय डुङ्गा र १० वटा पैडल डुङ्गा संचालनमा ल्याएको छ, जसले पर्यटकहरूलाई तालको यात्रा गर्न सजिलो बनाउनेछ।

चन्द्रनगर गाउँपालिकाका अध्यक्ष राजकुमार महतोले नाढीमन ताललाई पर्यटन प्रवर्द्धनको केन्द्र बनाउन विभिन्न पूर्वाधार विकासका काम गर्दै आएको बताउनुभयो। उहाँले देशभरका पर्यटकहरूलाई तालको सौन्दर्य र मनोरञ्जनका लागि भ्रमण गर्न आग्रह गर्नुभएको छ। स्थानीय बासिन्दा र आगन्तुक पर्यटकहरू डुङ्गा सञ्चालन पुनः सुरु भएकोमा खुसी भएका छन्। तालको स्वच्छ पानी, हरियाली वातावरण, र शान्त प्राकृतिक दृश्यले आगन्तुकहरूलाई आकर्षित गर्ने विश्वास गरिएको छ।

चन्द्रनगर गाउँपालिकाले तालको संरक्षण, सुविधाको विस्तार र आवश्यक पूर्वाधार निर्माणमा निरन्तर काम गरिरहेको छ। सयौं वर्ष पुरानो यो प्राकृतिक ताल स्थानीय र बाह्य पर्यटकहरूका लागि आकर्षणको केन्द्र रहँदै आएको छ। धार्मिक र सांस्कृतिक रूपमा समेत महत्वपूर्ण यो ताल सर्लाहीको महत्वपूर्ण पर्यटकीय स्थलमध्ये एक हो। अध्यक्ष महतोले नाढीमन ताल भ्रमण गर्न सबैलाई निमन्त्रणा दिनुभएको छ। मनोरञ्जन र प्रकृतिको सौन्दर्य अवलोकनका लागि इच्छुक पर्यटकहरूले चन्द्रनगर गाउँपालिकामा आएर यो अनुपम तालको अनुभव लिन सक्छन्।