सर्लाही, २७ पुष। सहारा पञ्चकन्या बचत तथा ऋण सहकारी संस्था लिमिटेडको १६ औँ वार्षिक साधारण सभा आइतबार सम्पन्न भएको छ।

साधारण सभा संस्थाका अध्यक्ष देवेन्द्र यादवको अध्यक्षता तथा मधेस प्रदेश सरकारका स्वास्थ्य मन्त्री जंगीलाल रायको प्रमुख आतिथ्यतामा सम्पन्न भएको हो। सभाको सुरुवात संस्थाका मुख्य प्रबन्धक शिवशंकर जयसवालले स्वागत मन्तव्यबाट गर्नुभयो।

कार्यक्रमका प्रमुख अतिथि मन्त्री रायले संस्थाको निरन्तर प्रगतिप्रति शुभकामना व्यक्त गर्दै सञ्चालक समिति तथा कर्मचारीहरूको कामको प्रशंसा गर्नुभयो। उहाँले चुनौतीपूर्ण परिस्थितिमा पनि समाज र समुदायलाई निरन्तर सेवा पुर्‍याउँदै आएको यस सहकारीको योगदान प्रशंसनीय भएको बताउनुभयो।

मन्त्री रायले पछिल्ला दिनमा केही सहकारीमा पारदर्शिता र अनुशासनहीनताको समस्या देखिएको उल्लेख गर्दै सहारा पञ्चकन्या सहकारीमा त्यस्तो समस्या नदेखिनु र संस्थाको आर्थिक अवस्था निरन्तर सुदृढ बन्दै जानु सकारात्मक पक्ष भएको धारणा व्यक्त गर्नुभयो।

साधारण सभामा सञ्चालक समितिका तर्फबाट आर्थिक वर्ष ०८१/८२ को वार्षिक प्रतिवेदन प्रस्तुत गर्दै कार्यकारी अध्यक्ष देवेन्द्र कुमार यादवले २७ हजार रुपैयाँ शेयर पूँजीबाट सुरु भएको संस्थाको कुल शेयर पूँजी हाल ७९ लाख २५ हजार २ सय रुपैयाँ पुगेको जानकारी दिनुभयो।

सभामा संस्थाका पूर्व सञ्चालक समिति पदाधिकारी तथा सदस्यहरू, शेयर सदस्य, कर्मचारी, नागरिक समाजका प्रतिनिधि, समाजसेवी, बुद्धिजीवी तथा पत्रकारहरूको उल्लेखनीय सहभागिता रहेको थियो।

कार्यक्रममा असल ऋणी, बचतकर्ता तथा सेवाकेन्द्रका असल फिल्ड कार्यकर्तालाई दोसल्ला ओढाई सम्मानपत्र प्रदान गरिनुका साथै झोला समेत वितरण गरिएको थियो।