उपेन्द्र यादवले पनि दिए सुशीला कार्कीलाई समर्थन

२७ भदौ, काठमाडौं । 

जनता समाजवादी पार्टी (जसपा) का अध्यक्ष उपेन्द्र यादवले वर्तमान संविधान संशोधन र पुनर्लेखन गरी परिमार्जन गर्न संविधान र संसद कायम राख्नुपर्ने बताएका छन् । उनले आज बिहान सामाजिक सञ्जालमा लेखेका छन्, ‘संविधान संशोधन र  पुनर्लेखन गरी परिमार्जन गर्न संविधान र संसदलाई कायमै राख्नुपर्दछ । संसद विघटन र संविधानको खारेजी मुलुकको हितमा हुन सक्दैन ।’ उनले अन्तरिम सरकार प्रमुख पूर्वप्रधानन्यायाधीश सुशीला कार्कीलाई बनाउने निर्णय सकारात्मक भएको पनि बताएका छन् ।

उनले लेखेका छन्, ‘अन्तरिम सरकारको नेतृत्वमा पूर्वप्रधानन्यायाधीश सुशिला कार्कीलाई सिफारिस गर्ने निर्णय अत्यन्त सकारात्मक रहेको छ ।’ राष्ट्रपतिको कार्यालय शीतल निवासमा बिहीबार रातभर भएको जेनजीसहितको वार्तामा अन्तरिम सरकार प्रमुख पूर्वप्रधान्यायाधीश कार्कीलाई बनाउने सहमति भए पनि निष्कर्षमा पुग्न भने बाँकी छ । आज पनि वार्ता जारी छ ।  यसअघि आजै पूर्वप्रधानमन्त्री बाबुराम भट्टराईले पनि प्रस्तावित  अन्तरिम सरकार प्रमुखमा सुशीला कार्कीलाई समर्थन जनाएका छन् ।