म भागेको छैन, गोरखा मिडियामा आएको पैसाको जिम्मेवारी लिन्छु– रवि लामिछाने

९ असोज , राष्ट्रिय स्वतन्त्र पार्टी (रास्वपा)का सभापति रवि लामिछानेले अनधिकृत रुपमा गोर्खा मिडियामा आएको पैसाको विषयमा आफू जिम्मेवार हुने बताएका छन् ।

संसदीय विशेष छानबिन समितिले आफूले अनधिकृत रुपमा सहकारीबाट पैसा नल्याएको प्रतिवेदन दिएको स्मरण गराउँदै उनले गोरखा मिडियामा आएको पैसाको जिम्मेवारी आफूले पनि लिने बताएका हुन् । ‘समितिले सहकारी ठगीमा मेरो संलग्नता छैन भनेको छ । समितिकै सभापति (सूर्य थापा)ले अन्तर्वार्तामा भनिसक्नुभयो,’ मंगलवार फेसबूक लाइभमा आउँदै लामिछानेले भने, ‘म संस्थामा भएको बेला आएको पैसाको जिम्मेवारी लिन्छु । कार्यरत भएको बेलाको जिम्मेवारी लिन्छु, म भागेको छैन । समितिको कुरा अक्षरशः पालना गर्नुपर्छ । यसका लागि कमिटेड छु ।’

आफू कार्यरत रहेको बेलामा पैसा आएको विषयमा कानूनी कारबाहीको सिफारिस गरेको विषय मान्ने पूर्वउपप्रधान तथा गृहमन्त्रीसमेत रहेका लामिछानेले स्पष्ट पारेका छन् ।  ‘आफू कार्यरत रहेको बेलामा पैसा आएको विषयमा कानूनी कारबाहीको सिफारिसको विषयलाई नकार्न मिल्दैन । म रहेको कार्यकालमा भएको गैरकानूनी कुराको नैतिक, कानूनी र आर्थिक जे जिम्मेवारी लिनुपर्छ, म तयार छु,’ उनले भने, ‘पछाडिको कुरालाई मैलै बंग्याउन मिल्दैन । समितिको सुझावलाई नकार्न सक्दैनौं । तर अनियमित तबरले गोरखा मिडियामा रकम ल्याउने कुरामा म संलग्नता छैन भन्नेमा दुईमत छैन ।’