सर्लाही, ११ पुष। राष्ट्रिय मुक्ति पार्टी नेपालले सर्लाहीका चारवटै निर्वाचन क्षेत्रबाट आगामी फागुन २१ गते हुने प्रतिनिधिसभा निर्वाचनका लागि उम्मेदवारको नाम सिफारिस गरेको छ।

पार्टीका जिल्ला अध्यक्ष गणेश यादवका अनुसार सर्लाहीका चारै क्षेत्रबाट प्रत्यक्षतर्फ तथा समानुपातिकतर्फका उम्मेदवारको बन्दसूची केन्द्रमा पठाइएको छ। उनका अनुसार प्रत्यक्षतर्फ क्षेत्र नं. १ बाट श्यामइन्दल साह र राम परीक्षण साहको नाम सिफारिस गरिएको छ।

क्षेत्र नं. २ बाट भने पार्टीका केन्द्रीय अध्यक्ष राजेन्द्र महतोको एकल नाम सिफारिस गरिएको छ। त्यस्तै क्षेत्र नं. ३ बाट लालबिहारी यादवको पनि एकल नाम सिफारिस भएको छ। क्षेत्र नं. ४ बाट भने रामकिशोर सिंह, रामप्रवेश साह र सुरेन्द्र महतो कुशवाहा गरी तीन जनाको नाम केन्द्रमा पठाइएको छ।‌