देशका छुट्टाछुट्टै स्थानमा भएका सवारी दुर्घटनामा पाँच जनाको मृ*त्यु

२४ जेठ, काठमाडौं ।

देशका छुट्टाछुट्टै स्थानमा भएका सवारी दुर्घटनामा पाँच जनाले ज्यान गुमाएका छन्। दोलखाको गौरीशंकर गाउँपालिका-४ डेपुङस्थित सडकमा सिंगटीबाट झ्याकुतर्फ जाँदै गरेको बा.१६ च ७६५१ नम्बरको बोलेरो अनियन्त्रित भई दुर्घटना हुँदा बोलरोमा सवार गौरीशंकर गाउँपालिका-४ डेपुङ बस्ने ४५ वर्षीया फुलमाया शेर्पा र ३२ वर्षीया डोल्मा शेर्पाको मृत्यु भएको छ।

शुक्रबार बेलुकी भएको उक्त दुर्घटनामा गम्भीर घाइते भएकी डोल्माको पशुपती चौलागाई स्मृती अस्पताल चरिकोटमा उपचारको क्रममा शुक्रबार राति मृत्यु भएको हो भने फुलमायाको थप उपचारको लागि चरिकोटतर्फ लैजाने क्रममा शनिबार बिहान बाटोमै मृत्यु भएको हो। साथै दुर्घटनामा घाइते भएका बोलेरोमा सवार १ जनाको स्थानीय रोल्वालिङ सामुदायिक अस्पताल सिंगटीमा उपचार भइरहेको छ। बोलेरो चालकलाई प्रहरीले नियन्त्रणमा लिएको छ। बाराको कोल्हवी नगरपालिका-८ कुसबार टोलमा कोल्हवीबाट सिमरातर्फ जाँदै गरेको बा.२० च ८७४२ नम्बरको स्कारपियो अनियन्त्रित भई शुक्रबार साँझ दुर्घटना हुँदा स्कारपियोमा सवार जीतपुरसिमरा उपमहानगरपालिका-४ हुलास

टोल बस्ने कुन्दन चौधरीको छोरा ५ महिनाको ऐलेक्स चौघरीको मृत्यु भएको छ। दुर्घटनामा गम्भीर घाइते भएका उनको एलएस न्यूरो अस्पताल परवानीपुरमा उपचारको क्रममा मृत्यु भएको हो। साथै दुर्घटनामा घाइते भएका स्कारपियोमा सवार २ जनाको सोही अस्पतालमा उपचार भइरहेको छ। हाल फरार स्कारपियो चालकको प्रहरीले खोजी गरिरहेको छ। रूकुम पश्चिमको सानीभेरी गाउँपालिका-७ जैदानेस्थित सडकमा साइकलको ठक्करबाट सोही ठाउँ बस्ने ७६ वर्षीय खड्क सिंह वलीको शुक्रबार राति घटनास्थलमै मृत्यु भएको छ। ठक्कर दिने साइकलका चालकलाई प्रहरीले नियन्त्रणमा लिएको छ।

यसैगरी रूकुम पश्चिम, बाँफिकोट गाउँपालिका-८ दुलीस्थित सडकमा दुलीबाट छिनखेततर्फ जाँदै गरेको ना.६ त ७११३ नम्बरको ट्याक्टर अनियन्त्रित भई दुर्घटना हुँदा ट्याक्टरमा सवार सोही गाउँपालिका-१० बस्ने १७ वर्षीय गोपाल खड्काको मृत्यु भएको छ। शनिबार बिहान भएको उक्त दुर्घटनामा गम्भीर घाइते भएका उनको जिल्ला अस्पतालमा उपचारको क्रममा शनिबार दिउँसो मृत्यु भएको हो। ट्याक्टर चालकलाई प्रहरीले नियन्त्रणमा लिएको छ। प्रहरीले सबै दुर्घटनाका सम्बन्धमा आवश्यक अनुसन्धान गरिरहेको जनाएको छ।