पाकिस्तानको ‘कब्जा’बाट ५०४ घण्टापछि मुक्त भए भारतीय सुरक्षा बलका जवान

३१ वैशाख, भारत ।

भारतको पन्जाबस्थित अटारी–वाघा सीमाबाट २३ अप्रिलमा पक्राउ परेका सीमा सुरक्षा बल (बीएसएफ) का जवान पूर्णम कुमार साहूलाई पाकिस्तानले बुधबार भारतलाई हस्तान्तरण गरेको छ। पन्जाबको फिरोजपुरमा अन्तर्राष्ट्रिय सीमा पार गर्दै गल्तीले  २३ अप्रिलका दिन पाकिस्तान पुगेका बीएसएफ जवान साहूलाई बुधबार सकुशल रिहा गरिएको हो।

उनलाई बिहान १०:३० बजे पाकिस्तानी रेन्जर्सले बीएसएफलाई शान्तिपूर्ण ढंगले र स्थापित प्रोटोकलअनुसार फर्काइदिएका हुन्। उनको सुरक्षित रिहाइका लागि बीएसएफले निरन्तर प्रयास गरेको थियो। ५०४ घण्टासम्म पाकिस्तानी नियन्त्रणमा रहेका साहूको रिहाइका लागि ६ भन्दा बढी फ्ल्याग मिटिङ गरिएको थियो भने सीमा क्षेत्रमा ८४ पटक सिटी बजाइएको थियो। सीओ स्तरको मिटिङ मात्र नभई बीएसएफ र पाकिस्तानी रेन्जर्सका उच्च अधिकारीहरूबीच समेत यो विषयमा कुराकानी भएको थियो। ती मिटिङमा भनिएको थियो कि जब रेन्जर्सको शीर्ष नेतृत्वबाट अनुमति प्राप्त हुन्छ, तब जवानलाई रिहा गरिनेछ। स्रोतहरूका अनुसार गत सातादेखि पाकिस्तानी रेन्जर्स फ्ल्याग मिटिङबाट टाढा भाग्न थालेका थिए।

उनीहरूबाट कुनै स्पष्ट प्रतिक्रिया प्राप्त भएको थिएन। त्यसपछि बीएसएफले संवादको अर्को उपाय अपनायो। जवानको रिहाइ सुनिश्चित गर्न कूटनीतिक माध्यमको पनि सहारा लिइएको खुलासा भएको छ। डीजीएमओको बैठकमा समेत यो विषय उठाइएको थियो। यो घटना २३ अप्रिलमा त्यतिबेला भएको थियो, जब बीएसएफ जवान साहू १८२औं बटालियन अन्तर्गत सीमा गेट नम्बर २०८/१ मा तैनाथ थिए। उनी बाली काट्ने काममा व्यस्त भारतीय किसानहरूको सुरक्षाका लागि निगरानी गरिरहेका थिए।  गर्मी बढेको कारणले उनले रुखको छायाँमा उभिन खोज्दा पाकिस्तानी रेन्जर्सले उनलाई हिरासतमा लिएका थिए। उनको सेवा राइफलसमेत जफत गरिएको थियो।