ब्रह्मपुरी गाउँपालिकाको सार्वजनिक सुनुवाइ सम्पन्न,
सारांश
- सर्लाहीको ब्रह्मपुरी गाउँपालिकाले आर्थिक वर्ष २०८२/०८३ मा प्रवाह गरेका सार्वजनिक सेवा, सञ्चालन गरेका विकास निर्माणका कार्यहरूको समीक्षा तथा आगामी आर्थिक वर्ष २०८३/०८४ का योजना तथा कार्यक्रमलाई थप प्रभावकारी बनाउन स्थानीयवासीको सुझाव संकलन गर्ने उद्देश्यले सार्वजनिक सुनुवाइ कार्यक्रम सम्पन्न गरेको छ।
- गाउँपालिकाको सभाहलमा आयोजित कार्यक्रममा गाउँपालिकाका जनप्रतिनिधि, कर्मचारी, विभिन्न राजनीतिक दलका प्रतिनिधि, नागरिक समाज, शिक्षक, बुद्धिजीवी, पत्रकार तथा स्थानीय सेवाग्राहीहरूको उल्लेखनीय सहभागिता रहेको थियो।
- सार्वजनिक सुनुवाइको क्रममा लेखा अधिकृत अनिल दासले चालु आर्थिकको आय–व्यय तथा बजेट खर्चको विस्तृत विवरण प्रस्तुत गरेका थिए।
सर्लाही, २८ असार ।
सर्लाहीको ब्रह्मपुरी गाउँपालिकाले आर्थिक वर्ष २०८२/०८३ मा प्रवाह गरेका सार्वजनिक सेवा, सञ्चालन गरेका विकास निर्माणका कार्यहरूको समीक्षा तथा आगामी आर्थिक वर्ष २०८३/०८४ का योजना तथा कार्यक्रमलाई थप प्रभावकारी बनाउन स्थानीयवासीको सुझाव संकलन गर्ने उद्देश्यले सार्वजनिक सुनुवाइ कार्यक्रम सम्पन्न गरेको छ।
गाउँपालिकाको सभाहलमा आयोजित कार्यक्रममा गाउँपालिकाका जनप्रतिनिधि, कर्मचारी, विभिन्न राजनीतिक दलका प्रतिनिधि, नागरिक समाज, शिक्षक, बुद्धिजीवी, पत्रकार तथा स्थानीय सेवाग्राहीहरूको उल्लेखनीय सहभागिता रहेको थियो। सार्वजनिक सुनुवाइको क्रममा लेखा अधिकृत अनिल दासले चालु आर्थिकको आय–व्यय तथा बजेट खर्चको विस्तृत विवरण प्रस्तुत गरेका थिए।
कार्यक्रममा सहभागी स्थानीयवासीले गाउँपालिकाबाट प्रदान हुँदै आएका सेवा–सुविधा, विकास निर्माणका कार्य, शिक्षा, स्वास्थ्य, कृषि, पशुपालन, सिंचाइ, सडक, खानेपानी, सामाजिक सुरक्षा भत्ता, रोजगार, सरसफाइ, विपद् व्यवस्थापन, बजेट कार्यान्वयन, योजना छनोट तथा सेवा प्रवाहका विषयमा आफ्ना जिज्ञासा, गुनासा र सुझाव प्रस्तुत गरेका थिए।
सहभागीहरूले गाउँपालिकाको सेवा प्रवाहलाई अझ छिटो, सहज, पारदर्शी र नागरिकमैत्री बनाउनुपर्ने, विकास निर्माणका काम गुणस्तरीय ढंगले सम्पन्न गर्नुपर्ने, कृषि क्षेत्रको आधुनिकीकरण, युवाका लागि रोजगारीका अवसर सिर्जना, शिक्षा तथा स्वास्थ्य सेवाको गुणस्तर अभिवृद्धि, विपन्न तथा लक्षित वर्गलाई प्रभावकारी सेवा उपलब्ध गराउनुपर्ने लगायतका विषयमा सुझाव दिएका थिए। केही स्थानीयले योजनाको अनुगमन, बजेटको प्रभावकारी कार्यान्वयन तथा सार्वजनिक खर्चमा पारदर्शिता कायम गर्नुपर्ने आवश्यकता पनि औँल्याएका थिए।
कार्यक्रममा उठेका प्रश्न तथा गुनासाको जवाफ गाउँपालिका अध्यक्ष रामपदारथ साह, प्रमुख प्रशासकीय अधिकृत धनञ्जय दास, सम्बन्धित विषयगत शाखाका प्रमुखहरू तथा वडा अध्यक्षहरूले दिएका थिए। उनीहरूले स्थानीयले उठाएका प्रत्येक विषयमा स्पष्ट धारणा राख्दै गाउँपालिकाले चालु आर्थिक वर्षमा सम्पन्न गरेका विकास निर्माणका काम, सेवा प्रवाहमा हासिल भएका उपलब्धि, कार्यान्वयनका क्रममा देखिएका चुनौती तथा आगामी दिनमा सुधार गरिने पक्षबारे विस्तृत जानकारी गराएका थिए।
गाउँपालिका अध्यक्ष रामपदारथ साहले स्थानीय सरकार जनताको सबैभन्दा नजिकको सरकार भएकाले नागरिकका सुझाव, आलोचना र गुनासालाई सकारात्मक रूपमा ग्रहण गर्दै सेवा प्रवाहलाई थप प्रभावकारी बनाइने बताए। उनले विकास निर्माणका काममा पारदर्शिता, जवाफदेहिता र गुणस्तरलाई प्राथमिकतामा राखेर अघि बढ्ने प्रतिबद्धता व्यक्त गर्दै सार्वजनिक सुनुवाइबाट प्राप्त सुझावलाई आगामी नीति, योजना तथा बजेट निर्माणमा समावेश गरिने जानकारी दिए।
प्रमुख प्रशासकीय अधिकृत धनञ्जय दासले गाउँपालिकाले कानुन र कार्यविधिअनुसार सेवा प्रवाह गरिरहेको उल्लेख गर्दै प्रशासनिक सेवामा देखिएका समस्याको समाधानका लागि आवश्यक सुधार प्रक्रिया निरन्तर अगाडि बढाइने बताए। उनले कर्मचारीहरूलाई सेवाग्राहीप्रति जिम्मेवार, उत्तरदायी र नागरिकमैत्री भएर काम गर्न निर्देशन दिइएको जानकारी पनि गराए।
विषयगत शाखाका प्रमुखहरूले आ–आफ्नो क्षेत्रसँग सम्बन्धित कार्यक्रम, बजेट खर्चको अवस्था, आगामी योजना तथा स्थानीयले उठाएका प्रश्नहरूको तथ्यपरक जवाफ दिएका थिए। वडा अध्यक्षहरूले पनि आफ्नो वडामा सञ्चालन भएका विकास आयोजना, भौतिक पूर्वाधार निर्माण, सामाजिक विकासका कार्यक्रम तथा आगामी आवश्यकताबारे जानकारी गराउँदै स्थानीयका सुझावलाई कार्यान्वयनमा लैजाने प्रतिबद्धता जनाए।
कार्यक्रममा सहभागी अधिकांश स्थानीयले सार्वजनिक सुनुवाइले जनप्रतिनिधि र नागरिकबीच प्रत्यक्ष संवाद गर्ने अवसर प्रदान गरेको भन्दै यस्ता कार्यक्रम नियमित रूपमा सञ्चालन गर्नुपर्ने धारणा व्यक्त गरेका थिए। उनीहरूले सार्वजनिक सुनुवाइले सेवा प्रवाहमा पारदर्शिता, उत्तरदायित्व र सुशासन प्रवर्द्धन गर्न महत्वपूर्ण भूमिका खेल्ने विश्वास व्यक्त गरे।
गाउँपालिकाले सार्वजनिक सुनुवाइ कार्यक्रमबाट प्राप्त सुझाव, सल्लाह र गुनासालाई आगामी आर्थिक वर्षका योजना, कार्यक्रम तथा बजेट निर्माण प्रक्रियामा प्राथमिकताका साथ समावेश गरिने जनाएको छ। साथै, नागरिकको सहभागिता, पारदर्शिता, सुशासन र उत्तरदायी स्थानीय शासनलाई संस्थागत गर्न यस्ता कार्यक्रमलाई निरन्तरता दिइने गाउँपालिकाले जनाएको छ।
ब्रह्मपुरी गाउँपालिकाको सहयोगमा सम्पन्न सार्वजनिक सुनुवाइ कार्यक्रमको सहजीकरण तथा व्यवस्थापन पिपुल मिडिया नेटवर्क प्रा.लि., मलंगवा–१०, सर्लाही ले गरेको थियो। कार्यक्रमले स्थानीय सरकार र नागरिकबीचको सम्बन्धलाई अझ सुदृढ बनाउँदै विकास निर्माण र सेवा प्रवाहलाई थप प्रभावकारी बनाउने विश्वास सहभागीहरूले व्यक्त गरेका थिए।
प्रतिक्रिया