११ असोज, सर्लाही ।

मलंगवा नगरपालिकाले डेंगु, जापानिज इन्सेफाइटिस (जेई) र मलेरिया नियन्त्रणका लागि लार्भा–साइडिङ स्प्रे कार्यक्रम सुरु गरेको छ । आज मंसिर ११ गतेदेखि नगरका सबै वडामा यो कार्यक्रम सक्रिय रूपमा सञ्चालन भइरहेको स्वास्थ्य शाखाले जनाएको छ । महामारी आकस्मिक रोग नियन्त्रण कार्यक्रम अन्तर्गत सञ्चालन गरिएको यस कार्यक्रममार्फत नगर क्षेत्रमा बढ्दो किटजन्य रोगको जोखिम न्यूनीकरण गर्न लार्भा नष्ट गर्ने औषधीय स्प्रे प्रयोग गरिएको हो ।

स्वास्थ्य शाखा प्रमुख विष्णुकान्त साहका अनुसार प्रत्येक वडामा पुगेर जमेको पानी, नाला तथा लामखुट्टे प्रजननका सम्भावित स्थानमा स्प्रे गरिनेछ । कार्यक्रममा पाँच जनाको स्प्रे टोलीसहित स्वास्थ्यकर्मी तथा नगरका कर्मचारीहरूको सक्रिय सहभागिता रहेको छ । लामखुट्टेको प्रजनन रोकथामका लागि घर–आँगन सफा राख्न, पानी जम्न नदिनु तथा जोखिमका स्थान हटाउन स्थानीयवासीलाई अनुरोध गरिएको छ । नगरप्रमुख नागेन्द्र प्रसाद यादवले नियमित रूपमा यस्ता सार्वजनिक स्वास्थ्य कार्यक्रम सञ्चालन गर्दै आएको उल्लेख गर्दै समुदायले पनि सहयोग र सतर्कता अपनाउनुपर्नेमा जोर दिएका छन् ।