ललितपुर महानगरपालिका–१४ स्थित टाइटानिक रेस्टुरेन्टमा २०६० साल कात्तिक ९ गते राति करिब ७ः ३० बजे देउसी भैलो खेलिरहेका बेला यो घटना भएको थियो । सो घटनामा ललितपुर उपमहानगरपालिका– १५ खुमलटारका २४ वर्षीय नोरबहादुर राउतलाई मदनबहादुर लिम्बु समेत ७ जनाको समूहले तरबार, रड लगायतका घातक हतियार प्रयोग गरी गम्भीर घाइते बनाएका थिए।

उपचारका लागि वीर अस्पताल, काठमाडौँ लगिएका राउतको २०६० साल कात्तिक १० गते मृत्यु भएको थियो। घटनापश्चात् फरार रहेका प्रतिवादीमध्ये विजयकुमार फोम्बो (लिम्बु) कोटेश्वरमा लुकिछिपी बसिरहेको भन्ने गोप्य सूचनाका आधारमा प्रहरी परिचालन गरिएको थियो। महानगरीय प्रहरी परिसर, ललितपुरबाट खटिएको प्रहरी अधिकृतसहितको टोलीले उनलाई फेला पारी पक्राउ गरेको हो। पक्राउ परेका फोम्बोलाई आवश्यक कारबाहीका लागि ललितपुर जिल्ला अदालतमा पेस गरिएको प्रहरीले जनाएको छ।