२६ जेठ, पर्सा ।

पर्साको वीरगञ्ज महानगरपालिका–१ छपकैयास्थित रामदेनी तिवारी आधारभूत विद्यालयका शिक्षक चन्देशकुमार चौहानविरुद्ध मुद्दा दायर भएको छ । नक्कली शैक्षिक योग्यताको प्रमाणपत्रका आधारमा नियुक्ति लिएको आरोपमा अख्तियार दुरुपयोग अनुसन्धान आयोगले आज विशेष अदालतमा उनीविरुद्ध मुद्दा दर्ता गरेको हो ।

चौहानले २०६० मंसिर ५ गते निमावि तृतीय श्रेणीअन्तर्गत अंग्रेजी शिक्षकमा स्थायी नियुक्ति पाएका थिए । तर, नियुक्तिका क्रममा उनले पेश गरेको अंग्रेजीमा स्नातक तह उत्तीर्ण प्रमाणपत्र झुट्टा रहेको पाइएको अख्तियारको ठहर छ । अदालतमा दायर अभियोग पत्रमा नक्कली प्रमाणपत्रका आधारमा सरकारी जागिर खाएर लाभ, ओहोदा र सुविधा लिएको जिकिरसहित भ्रष्टाचार निवारण ऐन, २०५९ को दफा १६ बमोजिम कैद र जरिवाना माग गरिएको छ ।