३ असोज, काठमाडौं ।

नेपाली कांग्रेसले जेनजी आन्दोलनपछि संसद् विघटन गरेर नयाँ सरकार गठन भएको प्रक्रियामा असहमति जनाएको छ।  शुक्रबार पार्टी कार्यालय सानेपामा बसेको केन्द्रीय कार्यसमितिको बैठकले संसद् विघटन असंवैधानिक भएको निष्कर्ष निकालेको हो।  जेनजीको आन्दोलनपछि पहिलोपटक बसेको केन्द्रीय समितिको बैठकको अध्यक्षता पार्टी उपसभापति पूर्णबहादुर खड्काले गरेका छन्।

सभापति शेरबहादुर देउवा जेनजी आन्दोलनकारीको आक्रमणमा परेर उपचारका लागि अस्पतालमै रहेकाले खड्काको अध्यक्षतामा बैठक बसेको हो।  जेनजी आन्दोलनको दोस्रो दिन (भदौ २४) मा देउवा दम्पतीमाथि निवासमै आक्रमण भएको थियो। उनीहरूको निवास पनि जलेर ध्वस्त भएको छ।  अस्पतालमा उपचाररत देउवाले आज संविधान दिवसको अवसरमा शुभकामना भने विज्ञप्ति निकालेर दिएका थिए।

त्यस्तै कांग्रेस केन्द्रीय कार्यालय सानेपा पनि आगोलागीले ध्वस्त भएको छ।  आजको बैठक उक्त आगोलागी भएकै भवनमा बसेको हो। यसअघि कांग्रेस कार्यसम्पादन समितिको बैठक खड्काकै अध्यक्षतामा भर्चुअलरुपमा बसेको थियो। आन्दोलनका क्रममा कांग्रेसका अधिकांश शीर्ष नेताहरूको घरमा समेत क्षति पुर्‍याइएको छ। आजको बैठकले उक्त घटनाप्रति निन्दा गर्दै पार्टी सुदृढीकरणमा ध्यान दिने निर्णय पनि गरेको छ।