३ भदौ, काठमाडौं ।

प्रधानमन्त्री केपी शर्मा ओलीले नेपालमा लगानी गर्न कुनै बाधा नरहेको बताएका छन् । मंगलबार १७ औं नाडा अटो शोको उद्घाटन गर्दै प्रधानमन्त्री ओलीले विश्वमा वैज्ञानिक खोज, अध्ययनसँगै नयाँ नयाँ विकास, आविष्कार र प्रगति भएको बताए । नेपालले पनि त्यस प्रकारको विकासको सहज उपभोग गर्ने स्थिति बनाउनुपर्ने प्रधानमन्त्री ओलीले बताए । उनले नयाँ ढंगले काम गर्ने युवाहरूलाई सरकारले सबै खालको साथ दिने विश्वास दिलाए ।  ‘हामीले अग्रगमन र आधुनिकीकरणका लागि नीतिगत व्यवस्था र पूर्वाधार विकास गरेका छौं ।  लगानी र काम गर्न कुनै बाधा छैन ।

अहिले असन्तुष्ट हुनुपर्ने कुनै कारण छैन । कोही असन्तुष्ट नै हुन्छु भनेर कसम खाएको छ भने त केही लाग्दैन’, उनले भने । उत्तर र दक्षिणतिर नयाँ र पक्की मार्ग बन्दै गरेका र अन्तर्राष्ट्रिय विमानस्थल थपिएका प्रधानमन्त्री ओलीले उल्लेख गरे ।  ‘हरित ऊर्जा, मिथेन ग्यास, धौवादी फलामको उत्पादन गरेर प्रयोग गर्दैछौं । प्रविधिको रूपान्तरण भइसकेको छ । यी सबैको ध्येय विकास र समृद्धि हो । यसमा तपाईंहरू ढुक्कले अगाडि बढ्नुस् । देशका लागि योगदान दिनुहोस्’, प्रधानमन्त्री ओलीले भने ।