२४ वैशाख, काठमाडौं ।  

जलविद्युत् कम्पनीहरूको प्राथमिक सेयर निष्कासन (आईपीओ) प्रक्रिया अघि बढाउन नेपाल धितोपत्र बोर्डले कमिसन मागेको आरोप लागेपछि अख्तियार दुरुपयोग अनुसन्धान आयोगले बोर्डको कार्यालयमा छापा मारेको छ । बुधबार मध्याह्न १२ बजे आसपास खुमलटारस्थित बोर्डको कार्यालयमा छापा मार्न अख्तियारको टोली पुगेको थियो ।

अख्तियारले आईपीओ निष्कासन प्रक्रियामा रहेका केही कम्पनीका फाइलहरू नियन्त्रणमा लिएको स्रोतले जानकारी दिए । ‘मध्याह्नतिर अख्तियारको टोली बोर्ड कार्यालय आएको थियो, ‘स्रोतले भन्यो, ‘आईपीओ निष्काशन प्रक्रियाका लागि बोर्डमा आवेदन दिएका मध्ये केही कम्पनीको फाइल अख्तियारले छापामारेर लिएर गएको छ ।’ धितोपत्र बोर्डले आईपीओ निष्कासन प्रक्रियामा रहेका कम्पनीहरूसँग कमिसन मागेको आरोप स्वतन्त्र ऊर्जा उत्पादकहरुको संस्था इप्पानले लगाएको थियो भने बुधबार बसेको प्रतिनिधि सभा बैठकमा प्रमुख प्रतिपक्षी दल नेकपा माओवादी केन्द्रले छानबिनको समेत माग गरेको थियो । अख्तियारमा यसबारेमा उजुरीसमेत परेपछि आयोग सक्रिय भएको हो ।