१० असोज ,सहकारी संस्थाको रकम गोरखा मिडिया नेटवर्कमा ल्याएर अपचलन गरेको आरोपमा पक्राउ परेका पूर्वडीआईजी छविलाल जोशी बिरामी परेका छन् ।

काठमाडौंबाट पक्राउ परेर कास्की प्रहरी हिरासतमा रहेका जोशी बिरामी परेपछि उनको बयान लिने काम पनि रोकिएको छ । जिल्ला प्रहरी कार्यालय कास्कीको हिरासतमा रहेका जोशीविरुद्ध प्रहरीले सहकारी ठगी र संगठित मुद्दाको अनुसन्धान गरिरहेको छ । बयानका लागि जिल्ला सरकारी वकिल कार्यालयमा लैजानुपर्ने बिरामी भएपछि छविलाई उपचारका लागि अस्पताल लगिएको छ ।  उनलाई हल्का निमोनियाको

लक्षण देखिएको प्रहरीले जनाएको छ । रुघाखोकीले समेत ग्रस्त भएपछि बयानमा नलगिएको कास्की प्रहरी प्रमुख एसपी मोहनकुमार थापाले जानकारी दिए । जोशीलाई मंगलबार दुई घण्टा सरकारी वकिल कार्यालयमा सोधपुछ गरिएको थियो । उनी बुधबारदेखि बिरामी भएको प्रहरीले जनाएको छ ।गोरखा मिडिया नेटवर्कमा अध्यक्ष जीबी राई र तत्कालीन प्रबन्ध निर्देशक रवि लामिछानेका व्यापारिक साझेदार

छविले सहकारीको रकम अपचलनबारे आफूलाई जानकारी नभएको संसदीय विशेष छानबिन समितिमा बयान दिएका थिए । समितिले जीबी, रवि र छविसहितलाई कारबाहीको सिफारिस गरेको थियो ।​ जीबी अहिले मलेसियामा छन् । रवि भने आफ्नो बचाउका लागि सामाजिक सञ्जालमार्फत् समर्थक र शुभेच्छुकसँग अनुनयविनय गरिरहेका छन् । प्रहरीले यसअघि रविलाई पनि पक्राउ गर्ने तयारी गरेको थियो । तर, अब

छविको बयानपछि मात्रै रविलाई पक्राउ गर्ने कास्की प्रहरीको तयारी छ । छविलाई संगठित अपराधमा मुद्दा दर्ता गरेकाले रविलाई पक्राउ गरेर बयान नलिई मुद्दा नटुंगिने प्रहरीले जनाएको छ ।छविले प्रहरीले पक्राउ गर्दा नै आफूभन्दा धेरै जानकारी रवि र जीबीलाई भएको भन्दै उनीहरूलाई पनि पक्राउ गरेर अनुसन्धान गर्न भनेका थिए ।  मलेसियामा लुकेर बसेका भनिएका जीबीविरुद्ध डिफ्यूजन र रेड नोटिस जारी भइसकेको छ ।