रूपन्देहीको तिलोत्तमामा स्कारपियो ठोक्किँदा एकको मृत्यु, पाँचजना घाइते
काठमाडौं। रूपन्देहीको तिलोत्तमामा स्कारपियो दुर्घटनामा एकजनाको मृत्यु भएको छ । तिलोत्तमा नगरपालिका–३ शान्तिकुञ्जमा भएको दुर्घटनामा पाँचजना घाइते भएका छन् । भैरहवाबाट बुटवलतर्फ आउँदै गरेको बा २० च १४३८ नम्बरको स्कारपियो गाडी सिद्धार्थ राजमार्गअन्तर्गत तिलोत्तमा नगरपालिकाको शान्तिकुञ्जमा सडक बत्तीको पोल र भित्तामा ठोक्किँदा अर्घाखाँची छत्रगञ्ज गाउँपालिका–८ घर घएका ३२ वर्षीय गाडी चालक विकास श्रेष्ठको मृत्यु भएको प्रहरीले जनाएको छ ।
दुर्घटनामा गम्भीर घाइते भएका चालक श्रेष्ठको उपचारको क्रममा बुटवलको चौराहा अस्पतालमा मृत्यु भएको हो । दुर्घटनामा ३१ वर्षीय विज्ञान श्रेष्ठ, ४९ वर्षीय सुरेन्द्र श्रेष्ठ, १८ वर्षीय विप्लव श्रेष्ठ, १७ वर्षीय सुदर्शन श्रेष्ठ र ३५ वर्षीय विशाल पन्थी घाइते भएका छन् । उनीहरूको बुटवलको चौराहा अस्पतालमा उपचार भइरहेको प्रहरीले जनाएको छ ।
