३ जेठ, काठमाडौं । नेपाली कांग्रेसको अवरोधका कारण सुदूरपश्चिम प्रदेशसभाको बैठक स्थगित भएको छ ।

मुख्यमन्त्री दीर्घ सोडारीले विश्वासको मत लिने कार्यसूची रहेकामा नेपाली कांग्रेस र नागरिक उन्मुक्ति पार्टीको रेशम चौधरी पक्षका संसदहरूको अवरोधका कारण बैठक ३० मिनेटका लागि स्थगित भएको हो । नाउपाबाट मन्त्री बनेकाहरू सत्तापक्षतर्फ थिए भने रेशमपक्षका सांसदहरू प्रतिपक्षमा छन् । तेस्रोपटकको प्रयासमा सोडारीले आज विश्वासको मत लिन लागेका हुन् । ६ वैशाखमा सुदूरपश्चिमको मुख्यमन्त्रीमा नियुक्त भएका सोडारीलाई एमाले, माओवादी केन्द्र, नागरिक उन्मुक्ति पार्टीका रञ्जिता श्रेष्ठ पक्षका सांसद र स्वतन्त्र सांसद तारा जोशीको समर्थन रहेको छ । एमाले विश्वासको मत दिने तर सरकारमा जाने निर्णयमा पुगेपछि सोडारीलाई सहज भएको छ । तर, कांग्रेसले अवरोध गरेपछि बैठक स्थगित हुँदा विश्वासको मतसम्बन्धी प्रस्ताव पेस हुन पाएन ।

५३ सदस्यीय सुदूरपश्चिम प्रदेशसभामा मुख्यमन्त्रीले विश्वासको मत पाउन २७ सांसद आवश्यक पर्छन् । यहाँ एमाले, माओवादी केन्द्र, एकीकृत समाजवादी, नाउपा रन्जिता पक्षका दुई सांसद र स्वतन्त्र सांसदले विश्वासको मत दिँदा बहुमत पुग्छ । प्रदेशसभामा हाल नेपाली कांग्रेसका १८, माओवादी केन्द्रका सभामुखसहित ११, एमालेका ११, नागरिक उन्मुक्तिका सात, एकीकृत समाजवादीका चार, राप्रपाका एक र एक स्वतन्त्र सांसद छन् ।