२४ वैशाख, पोखरा–

तनहुँको शुक्लागण्डकी नगरपालिका–१०, लोकदीटारका स्थानीयवासीले आफ्नै वडामा आधारभूत स्वास्थ्य केन्द्र स्थापना हुनुपर्ने माग गर्दै मेयर कृष्णराज पण्डितको कार्यकक्षमा ताला लगाएका छन् । मंगलबार पहिलो चरणमा नगरपालिकाको मुख्य प्रवेशद्वारमा ताला लगाइएको थियो । बुधबार दिउँसो २ बजेपछि उक्त ताला खोल्दै आन्दोलित स्थानीयले मेयरको कार्यकक्षमा ताला लगाएका हुन् ।

स्वास्थ्य मन्त्रालयमा आधारभूत स्वास्थ्य केन्द्रका लागि लोकदीटारवासीले निवेदन दिएका थिए। सो निवेदनमा वडा कार्यालय र नगरपालिकाले समेत सिफारिस गरेका थिए । मन्त्रालयबाट बजेट प्राप्त भए पनि निर्माण स्थलबारे सहमति नजुट्दा विवाद चुलिएको हो । हाल आधारभूत स्वास्थ्य केन्द्र वडा नं. १० को मुकाम छब्दीमा अवस्थित भाडाको भवनमा सञ्चालन भइरहेको छ। तर स्थानीयले प्राप्त बजेटले सो भवन नबनाईकन लोकदीटारमै नयाँ भवन निर्माण गरिनुपर्ने माग गर्दै आन्दोलन चर्काएका छन् ।

स्थानीय आन्दोलनरत रहे पनि मेयर कृष्णराज पण्डित वार्ताका लागि उपस्थित भएनन् । उपमेयर खुमबहादुर विक ‘राजु’, प्रमुख प्रशासकीय अधिकृत रामचन्द्र लामगादे र स्वास्थ्य शाखा प्रमुख ढालबहादुर थापा (डिबी) ले आन्दोलनकारीहरूसँग वार्ता गरे पनि कुनै निष्कर्षमा पुग्न सकेनन् । नगरपालिकाले एउटै वडाभित्र दुई वटा आधारभूत स्वास्थ्य केन्द्र निर्माण गर्न नीतिगत प्रतिबन्ध रहेको बताउँदै, विकल्पस्वरूप लोकदीटारमा शहरी स्वास्थ्य केन्द्र स्थापना गर्ने प्रतिबद्धता जनाएको थियो । तर, आन्दोलित स्थानीयहरूले सो प्रस्ताव अस्वीकार गर्दै मेयर स्वयंले जबाफदेही बन्नुपर्ने माग गरेका छन् ।