साउदीमा १०१ जना विदेशीलाई मृत्युदण्ड, कुन देशका कति ?
३ मंसिर, काठमाडौं । साउदी अरेबियाले यो वर्ष एक सयभन्दा बढी विदेशी नागरिकलाई मृत्युदण्ड दिएको छ । समाचार एजेन्सी एएफपीको रिपोर्टमा यो दाबी गरिएको हो ।
हालै लागूऔषध तस्करीको आरोपमा एक यमनी नागरिकलाई मृत्युदण्डको सजाय सुनाइएको छ । रिपोर्टअनुसार यो वर्ष अहिलेसम्म साउदीले कुल १०१ विदेशी नागरिकलाई मृत्युदण्ड दिएको छ । यो सन् २०२३ र २०२२ को तथ्यांकभन्दा तीन गुणा हो । सन् २०२२ र ०२३ मा ३४/३४ जनालाई मात्र मृत्युदण्ड दिइएको थियो ।
रिपोर्टअनुसार यस वर्ष मृत्युदण्डको सजाय सुनाइएका विदेशी नागरिकमा पाकिस्तानका २१, यमनका २०, सिरियाका १४, नाइजेरियाका १०, इजिप्टका नौ, जोर्डनका आठ र इथियोपियाका सात जना छन् ।यसबाहेक सुडान, भारत र अफगानिस्तानका तीन–तीन जना र श्रीलंका, इरिट्रिया र फिलिपिन्सका एक–एक जना छन् । मानव अधिकारवादी संगठनहरूले साउदीको मृत्युदण्ड सजायको आलोचना गर्दै आएका छन् । सेप्टेम्बरमा एम्नेस्टी इन्टरनेशनलले पनि मृत्युदण्डको सजाय बढेकोमा चिन्ता व्यक्त गरेको छ ।
Post Comment