सन्दीप लामिछानेविरुद्धको बलात्कार मुद्दाको सुनुवाइ स्थगित
७ असोज, काठमाडौँ– क्रिकेटर सन्दीप लामिछाने विरुद्धको बलात्कार मुद्दाको सुनुवाइ फेरि स्थगित भएको छ।
काठमाडौँ जिल्ला अदालतमा न्यायाधीश अभाव भएपछि उक्त मुद्दा स्थगित भएको हो। यसअघि गत सोमबार पनि सन्दीप विरुद्धको उक्त मुद्दा पेसी नचढी स्थगित भएको थियो।
काठमाडौँ जिल्ला अदालतबाट न्यायाधीशहरू सरुवा भएर गएको र नयाँ अझै काममा नआइसकेकाले मुद्दाको सुनुवाइमा ढिलाइ भएको हो। सर्वोच्च अदालतले सन्दीप विरुद्धको मुद्दालाई यथाशीघ्र टुंगो लगाउन भने पनि काठमाडौँ अदालतले प्राथमिकतामा राखेर अघि बढाउन सकेको छैन।
भदौ २१ गतेको सुनुवाइमा न्यायाधीश शकुन्तला कार्कीले उक्त मुद्दा हेर्दाहेर्दैमा राखेकी थिइन्। त्यसपछि सन्दीपका अधिवक्ता सरोज घिमिरेले बसाइँ सर्नुअघिको नगरपालिकाको कागजातमा पीडितको यकिन जन्ममिति हुन सक्ने भन्दै कागजात मगाउन माग गरेका थिए। उक्त माग बमोजिम न्यायाधीश कार्कीको इजलासले फेरि पीडितको जन्मदर्ता मगाउन आदेश दिएको थियो।
