काठमाडौं । आज विश्व वातावरण दिवस विभिन्न कार्यक्रम गरी मनाइँदै छ । यस वर्ष हाम्रो ‘भूमि हाम्रो भविष्य’ भन्ने राष्ट्रिय नाराका साथ नेपालमा विश्व वातावरण दिवस मनाइँदै छ । यस दिवसका अवसरमा देशका विभिन्न ठाउँमा वृक्षारोपणका कार्यक्रम पनि आयोजना गरिएको छ ।

संयुक्त राष्ट्रसंघीय वातावरण कार्यक्रमको आह्‌वानमा हरेक वर्ष जुन ५ तारिखमा यो दिवस मनाउने गरिएको छ । सन् १९७३ देखि विश्व वातावरण दिवस मनाउन सुरु गरिएको हो । ‍‍‌‌

वातावरण दिवसको अवसरमा राष्ट्रपति रामचन्द्र पौडेलले शुभकामना सन्देशमार्फत हामी सबैले आफ्नो घरवरिपरि रहेको वातावरण सुधार गर्दै वन, जल, वनस्पति, कृषि तथा जीवहरूको पर्यावरणीय सम्बन्धलाई जीवनमुखी बनाउनुपर्ने बताउनुभएको छ।

उहाँले नेपालको संविधानले प्रदत्त गरेको स्वच्छ वातावरणमा बाँच्न पाउने हकलाई सार्थक बनाउनको लागि प्रण गर्नुपर्ने पनि बताउनुभएको छ ।