८ पुस, दाङ — मोटरसाइकल दुर्घटनामा परी आइतबार राति तुलसीपुरमा एकजनाको मृत्यु भएको छ । मृत्यु हुनेमा मोटरसाइकलमा सवार परिवर्तन गाउँपालिका–२ रोल्पाका ३१ वर्षीय दिलप्रसाद खत्री रहेको इलाका प्रहरी कार्यालय तुलसीपुरका सूचना अधिकारी प्रहरी निरीक्षक प्रकाश थापाले बताए ।

राप्ती राजमार्ग अन्तर्गत तुलसीपुरबाट जसपुरतर्फ जाँदै गरेको रा ३ प ६४९३ नम्बरको मोटरसाइकल आइतबार अपराह्न तुलसीपुर उपमहानगरपालिका–१२ टरिगाउँमा अनियन्त्रित भई पल्टिएको थियो ।

दुर्घटनामा घाइते खत्रीको उपचारका क्रममा आइतबार राति नेपालगगन्ज मेडिकल कलेज कोहलपुरमा मृत्यु भएको प्रहरी निरिक्षक थापाले जानकारी दिए । दुर्घटनामा मोटरसाइकल चालक तुलसीपुर–११ का ३१ वर्षीय पंकज खत्री गम्भीर घाइते भएका छन् । उनको मेडिकल कलेज कोहलपुरमा उपचार भइरहेको थापाले बताए ।